partekatu
Etxebizitza Sailak 2026an 3.669 etxebizitza eta bizitoki izateko 596 milioi euroko aurrekontu bateratua izatea "ospatu" du
Lurraldearen arabera, Gipuzkoak izango du bultzadarik handiena, 1.672 etxebizitza eraikiko baitira. Horietatik 850 datorren urtean hasiko dira
Bizkaian, Eusko Jaurlaritzak 1.107 etxebizitza egingo ditu, eta horietatik 458 entregatuko ditu 2026an
Arabak babes publikoko 890 etxebizitza izango ditu obratan, eta Vitoria-Gasteizen 158 babes ofizialeko etxebizitza berrirekin hasiko dira
Itxasok iragarri duenez, Euskadik Etxebizitzaren Lurralde Plan Sektoriala (LPS) osatzeko lanak hasiko ditu, eta Visesa erakundea baliabide propio bihurtzeko proposamena egingo du
Denis Itxaso Eusko Jaurlaritzako Etxebizitza eta Hiri Agendako sailburuak agerraldia egin du gaur Eusko Legebiltzarreko Etxebizitza Batzordean, Sailaren 2026rako aurrekontu-proiektua aurkezteko. Haren hitzetan, kontu horiek “etxebizitza Eusko Jaurlaritzaren lehentasunen erdigunean jartzen dute”, eta “plan integrala da, erronkari aurre egiteko prest dagoena”.
Etxebizitza eta Hiri Agendaren aurrekontua 502,2 milioi eurokoa izango da, aurreko ekitaldikoa baino %11,2 handiago, alegia. Europako BEM funtsak (60,1 milioi) alde batera utzita, baliabide propioak %37 haziko dira, 322,5 milioi eurotik 422,1 milioi eurora pasako baitira.
Baliabide horiei Etxebizitzaren Funts Sozialari 20 milioi euroko hasierako ekarpena gehitu behar zaie, “Euskadik etxebizitza eraikitzeko duen erronka izugarriari erantzuteko baliabide pribatuak palanka-efektu gisa erabiltzeko”, adierazi du sailburuak.
Ondorioz, Sailaren eta Alokabide eta Visesa sozietate publikoen aurrekontu bateratua 596,1 milioi eurokoa izango da, 2025ean baino %14 gehiago. “Etxebizitza ezin da pribilegio bat izan Euskadin. Gure Etxebizitza Legeak aitortzen duen eskubide bat da, eta gizarte-ongizaterako euskal sistemaren oinarri izan behar du”, gogorarazi du Itxasok.
Plan Integralerako inoizko aurrekonturik handiena
Etxebizitza Programak 394,4 milioi euro izango ditu, eta 102,5 milioi euro gehiago inbertitzeko ahalmena izango du. Horri Next Generation funtsetatik datozen 60,1 milioi gehitu behar zaizkio, guztira 454,5 milioi eurora iristeko.
Sozietate publikoek Plan Integralean duten funtzioa ere indartuko dute. Visesak 140,2 milioi izango ditu —%39,6 gehiago— eta 2026ko kontratu-programaren bidez 788 etxebizitza eraikitzeko aukera emango du. Bestalde, Alokabidek 146,5 milioi euro izango ditu —%22,5 gehiago— eta Bizigune eta Gaztelagun bezalako programak indartzeko aukera emango du. “2026ko aurrekontuak alokairu eskuragarriko 7.000 etxebizitza baino gehiago izateko oinarriak finkatzen ditu, eta horien erdiak 36 urtetik beherako gazteentzat izango dira”, sailburuak nabarmendu duenez.
Alokairu-programara 343,6 milioi euro bideratuko dira, etxebizitza-programaren zuzkidura osoaren %75a, hau da, 2024an baino 95,1 milioi gehiago.
Hala, 2026an hasiko dira eraikitzen Euskadin babes publikoko 1.713 etxebizitza eta alokairu sozial eta eskuragarrirako zuzkidura-bizitokiak. Horietatik, 225 Sailak sustatuko ditu (46 milioi) eta 788 Visesak (35,2 milioi), “inoizko enkargurik handiena”, adierazi du Itxasok, sozietate publiko hori baliabide propio bihurtzeko proposamena iragarri ondoren.
Gainera, alokairu eskuragarria sustatzeko programak 35,7 milioi bideratuko ditu beste 700 etxebizitza alokairu babestutan jartzeko, lankidetza publiko-pribatuaren bidez. Jarduketa hori osatzeko, 150 etxebizitza erosiko dira 26 milioiren bidez. Guztira, alokairuko babes publikoko 1.863 etxebizitza berri izango dira, eta 142,9 milioi euro bideratuko dira horietara, ordainketa- eta konpromiso-kredituetarako.
Gipuzkoa: 1.672 etxebizitza eraikitzen eta 666 berri 2026an
Lurraldeei dagokienez, Gipuzkoa izango da 2026an inpaktu handiena izango duen lurraldea: 1.672 etxebizitza egongo dira eraikitzen eta 666 etxebizitza berri eraikitzen hasiko dira, Andoainen (80), Donostian (280, Lorategi Hirian eta Martutenen), Irunen (36), Ordizian (214), Zumarragan (44) eta Beizaman (12).
Gipuzkoako bultzada horri gehituko zaizkie beste 184 zuzkidura-bizitoki, Donostian (89, Erriberetan eta Ulian), Lezon (52), Zumarragan (24) eta Eibarren (19). Guztira, 850 egoitza-unitate jarriko dira martxan 2026an Gipuzkoan. Horrez gain, beste 822 etxebizitza daude dagoeneko martxan, Eibarren (36), Hondarribian (66), Irun - San Migelen (437), Tolosan (192) eta Zarautzen (91), eta 2026an entregatuko dira horietatik 193, Eibarren, Hondarribian eta Zarautzen, hain zuzen.
Bizkaia: 1.107 etxebizitza eraikitzen eta 458 emateko
Bizkaian, 1.107 etxebizitza ariko dira eraikitzen, Bilbon (607) —Boluetan (319), Zorrotzaurren (179), Cortesen (23), Otxarkoagan (60), Gimnasion (12) eta Begoñan (14)—, Abanto-Zierbenan (40), Getxon (54), Muskizen (75), Ortuellan (94), Sestaon (180) eta Sopelan (57). Horietatik guztietatik, 458 etxebizitza 2026an entregatuko dituzte.
Araba: 890 etxebizitza eraikitzen 2026an
Araban, Sailak 158 etxebizitza berri hasiko ditu Gasteizen (Salburua) 2026ko kontratu-programaren bidez, eta dagoeneko eraikitzen ari diren 732ri gehituko zaizkie. Agurainen (58), Amurrion (60), Laudion (93) eta Gasteizen (521) —Salburuan eta Arkauten— egingo dira horiek. Guztira, 890 etxebizitza babestu egingo dituzte 2026an Araban.
Laburbilduz, Itxasok azpimarratu du hiru lurraldeetako zifra horien arabera “aurrekaririk gabeko jauzia emango dela alokairuko etxebizitza publikoen ekoizpenean”.
Biziguneren aurrekontua %22,4 handiagoa izango da
Bestalde, etxebizitza hutsak alokairu eskuragarrira bideratzeko Bizigune programak 41 milioi eurotik 50,2 milioi eurora igoko du aurrekontua, %22,4 gehiago. Helburua da Bizigunen 8.400 etxebizitza aktibo eta guztira Alokabidek kudeatutako 19.000 etxebizitza lortzea.
Era berean, doako alokairuko aseguru publikoa abiaraziko da eremu tentsionatuetan, ez-ordaintzeak eta kalteak estaliko dituena erreferentzia-prezioen indizea betetzen duten alokairuko etxebizitzetan. 250.000 euro gehigarri izango ditu eta Etxebizitza Ministerioaren funtsetatik etorriko dira.
Inbertsio handiagoa lurzoruan eta birgaitzeetan
Sailak 21 milioi euro bideratuko ditu alokairuko babes publikoko 2.200 etxebizitzatarako lurzorua erosi eta urbanizatzeko; horietatik 2.000 Sailak sustatuko ditu zuzenean, eta beste 200ak Visesak.
Halaber, 113,5 milioi euro (etxebizitza-programaren %25) birgaitze-lanetarako erabiliko dira, birgaitutako egoitza-parkearen urteko %2,5eko ratioari eusteko eta 2030ean %3ra iristeko. Kopuru horretatik, 49,2 milioi partikular eta auzokide-erkidegoetarako diru-laguntzetara bideratuko dira, eta, horren bidez, 3.300 eraikinetan eta 31.650 etxebizitzatan jardun ahal izango da, eta 5.000 etxetako irisgarritasuna hobetzeko 550 igogailu instalatu ahal izango dira.
Etxebizitzarako Eskubide Subjektiboa eta gazteentzako laguntza
Era berean, Eusko Jaurlaritzak Etxebizitzarako Eskubide Subjektiboaren estaldura 35.000 familiara zabaltzea aurreikusi du 2026an. Horretarako, etxebizitza berriak esleituko dira, Alokabideko parke publikoa txandakatuta, eta 19.000 etxebizitza kudeatuko dira eskuratutako eta lagatako etxebizitzei esker.
Horrez gain, 65 milioi euro bideratuko dira Etxebizitzarako Prestazio Ekonomikoetara; 2025arekin alderatuta 35 milioi gehiago bideratuko dira, eta zenbateko hori handitu egin daiteke beharren arabera. Gaztelagun programa %15 haziko da, 28,2 milioi euroraino, 9.500 onuradunengana iristeko helburuarekin, sarbide-atalaseak handituta eta tentsionatutako eremuetan errenta handiagoko alokairuak estalita.
“Gazteak ari dira bereziki bizileku-krisia pairatzen. Hori dela eta, gazteek arreta berezia merezi dute, eta alokairu eskuragarriko etxebizitza guztien %50a 36 urtetik beherakoentzat gordeko dira”, esan du Itxasok.
Bestalde, Premiazko Neurrien Legeak 2.000 zuzkidura-bizitoki berri eraikitzea ahalbidetuko du parke publikoko eraikinen gainean, eta mota horretako egoitzen egungo zifra hirukoiztu egingo da.
Lurralde Plangintza eta Hiri Agenda
Lurralde Plangintza eta Hiri Agenda arloak 42,37 milioi euro izango ditu 2026an. Horietatik 36,3 milioi 20 udalerritan 24 auzo zaurgarri berroneratzeko eta 3.000 etxebizitza inguru hobetzeko erabiliko dira.
Proiektuak udalerri hauetan egingo dira: Bilbo, Eibar, Lasarte, Pasaia, Abanto-Zierbena, Santurtzi, Trapagaran, Amurrio, Portugalete, Urduña, Arrasate, Bermeo, Donostia, Elgoibar, Irun, Leaburu, Errenteria, Sestao, Soraluze eta Gasteiz.
Euskadik bere aurreneko Etxebizitzaren Lurralde Plan Sektoriala egingo du
2026ko berrikuntza nagusi gisa, Etxebizitza eta Hiri Agenda Sailak Euskadiko aurreneko Etxebizitzaren Lurralde Plan Sektoriala (LPS) prestatzeari ekingo dio, udalez gaindiko plangintzako tresna aitzindaria izango dena.
Sailburuaren arabera, horrek “lurralde osoko etxebizitza politikak modu koherentean bideratzea ahalbidetuko du, etxebizitza babestuaren beharrak kuantifikatzea, lokalizazio-irizpideak zehaztea eta udal mugak gaindituko dituen estrategia metropolitarra ezartzea”, azaldu du Itxasok. LPS hori Itsasertzaren, Baliabide Turistikoen eta Energia Berriztagarrien arloetan garatzen ari direnekin batera garatuko da, Turismo, Industria eta Energia Sailekin elkarlanean.
Amaitzeko, Itxasok azpimarratu du etxebizitzaren krisiak inoiz ikusi gabeko dimentsio sozial eta ekonomikoa hartu duela, eta horren ondorioz erabaki duela Eusko Jaurlaritzak arlo horretara bideratutako baliabideak nabarmen indartzea. “Etxebizitza da gure garaiko erronka nagusia, eta aurrekontu honek ausardiaz aurre egiteko gaitasuna indartzen du, erantzun eraginkorra, bidezkoa eta iraunkorra emateko behar diren baliabideak bermatuta”, esanez amaitu du sailburuak.
