partekatu
Idoia Mendia: “Sozialdemokratak oinarritzat bihotz sozial bat duen Europarekin konprometitua gaude”
Euskal europarlamentari sozialistak “hazkunde ekonomikoaren eta kohesio sozialaren” europar proiektu bat eraikitzearen garrantzia nabarmendu du, “Europa indartsua nahi ez duten” kontrakoei aurre egiteko
Iratxe Garciak, Europako Eztabaida Foroan: “Gobernatzen dakien eta errealitateak martxan jarri nahi dituen ezkerra gara”
Idoia Mendia euskal europarlamentari sozialistak sozialdemokraziak DNA sozial eta kohesionatzaile sakon bateko europar proiektuaren eraikuntzan duen zeregina goratu du. “Sozialdemokratak oinarritzat bihotz sozial bat duen Europarekin konprometitua gaude”, esan du. “Nola aldatu gara? Europar Batasunaren 40 urte” izeneko Europako Eztabaida Foroan, “Historia, erronkak eta etorkizuneko perspektibak” izenburupean, Mendia herritarrak kohesio sozialaren bidez babestuko dituen eta hazkunde ekonomikoa gizarteko geruza guztietara helduko den Europa bat garatzen jarraitzearen alde azaldu da.
“Pertsonek ez badute nabaritzen laguntza eta hurbiltasunik Europako erakundeen aldetik, botoa aukera populistei emateko atea zabalduko da”, adierazi du. Idoia Mendiaren esanetan, Espainia Europako Ekonomia Erkidegoan (EEE) sartu zenean –egun ezagutzen dugun Europar Batasunaren aitzindaria–, “demokratikoagoak eta irekiagoak izateko leiho bat zabaldu zen”. Eta herrialdeari ekarri zion aurrerapen eta eraldaketa horren adibide modura, zera esan du: “orain harrotasunez esan dezakegu Espainia dela Europako politika askoren buruan”.
Euskal eurodiputatu sozialistarentzat, Europa da “giza eskubideak hobekien defendatzen dituen espazioa”. Eta “multilateralismoa errespetatzen ez den” nazioarteko koiuntura zailaz ohartarazi du. “Nazioarteko harremanak aldatu egin dira, eta gure kontrakoek ez dute nahi Europa indartsu bat”, adierazi du. “Horregatik, indartsuak izan behar dugu eta europar gisara dugun egitekoa sinetsi behar dugu. Giza eskubideen eta askatasunen itsasargia gara munduan”, adierazi du.
Europako Parlamentuko Europako Sozialista eta Demokraten Taldeko (S&D) presidenteak, Iratxe Garciak, bere aldetik, sozialdemokrazia “gobernatzen duen eta errealitateak martxan jarri nahi dituen ezkerraren sinonimo” dela azpimarratu du. “Ezin gara izan oihuen eta banderaren ezkerra”, esan du. Era berean, Espainiako sozialistek Europako Parlamentuaren Talde Sozialistan betetzen duten “egiteko garrantzitsua” nabarmendu du.
Espainia europar proiektuan sartu zenean horrek ekarri zuen inpaktu positiboa ere azpimarratu du Garciak, “askatasunaren eta demokraziaren ametsa gauzatu zuena”. “Garai hartako espainiar demokrazia gaztearentzat, askatasunetara eta garapeneko espazio batera itzultzea bezala izan zen”, adierazi du.
Europak pandemiaren aurrean eman zuen erantzun ezberdina ere hizpide izan du Iratxe Garciak. Izan ere, europar txertatze-programa bati bide eman zion ikuspegi aurrerakoi batetik, eta jendea “Europatik hurbil sentitu zen” bertan. “2008koaren aldean krisia oso bestela kudeatu izan zuen Europak. Eta zen kasualitatea izan, lider sozialdemokrata ugari zeudelako orduko hartan.
Ramon Rubial Fundazioaren presidenteak, Eider Gardiazabalek, “gerta zekigukeen onena Europar Batasunaren barruan egotea” dela esan du. “Herrialde asko dabiltza hor sartu nahian, eta beldur digutenek Europaren proiektua sabotatzen saiatzen dira kanpotik”, azaldu du. Eta “boterea eta bihotza” izango duen Europa baten alde azaldu da.
