partekatu
Ekonomia, Lan eta Enplegu Sailak 1.266 euroko aurrekontua aurkeztu du, enpleguaren kalitatearen, justizia sozialaren eta inklusioaren aldeko apustu argiarekin
Sailaren kontuak %3,3 hazten dira aurreko ekitaldiarekin alderatuta, profil nabarmen aurrerakoia dute eta lau aldiz biderkatu ditu udalei eta aldundiei enpleguko eta tokiko garapeneko planak egiteko ematen zaizkien laguntzak
Eusko Jaurlaritzak “herritar guztientzako eskubideak eta aukerak zabaltzeko borondatea” duela azpimarratu du Torres lehendakariordeak, “inor atzean utziko ez duen hazkunde-ekonomia baten alde eginez”
Lanbidek 500 milioi euro baino gehiago kudeatuko ditu enplegu politika aktiboak indartzeko, esaterako prestakuntzarako, kontratazioa sustatzeko eta kolektibo ahulenei laguntzeko
Eusko Jaurlaritzako Ekonomia, Lan eta Enplegu Sailak astelehen honetan aurkeztu du 2026rako aurrekontu proiektua. 1.266,2 milioi eurokoa izango da, hau da, aurreko ekitaldian baino %3,3 gehiago. Igoera horri esker, indartu egingo ditu Eusko Legebiltzarrarekin hartutako konpromisoak, eta aurrera egingo du justizia sozialaren defentsan, desberdintasunen murrizketan eta aberastasunaren birbanaketan, epe luzerako eta legealdiko begirada batekin.
Mikel Torres lehendakariorde eta Ekonomia, Lan eta Enplegu sailburu denak nabarmendu duenez, “aurrekontu hauek Eusko Jaurlaritzaren arrasto aurrerakoia islatzen dute, baita herritar guztientzako eskubideak eta aukerak zabaltzeko dugun borondatea ere. Inor atzean uzten ez duen eta pertsonak politika publikoen erdigunean jartzen dituen hazkunde-ekonomiaren aldeko apustu egiten dugu”.
Enpleguko, prestakuntzako, inklusioko, kontratazioaren sustapeneko eta enpresentzako zerbitzuetako politika aktiboak indartzea da aurrekontuaren ardatz nagusietako bat, Lanbideren bidez, 516 milioi euro kudeatuko ditu-eta programa horietan. Gainera, 688 milioi euro bideratuko dira Diru-sarrerak Bermatzeko Errentara (DSBE), Bizitzeko Gutxieneko Diru-sarrerara (BGDS) eta Etxebizitzarako Prestazio Osagarrira (EPO), eta, horrela, gizarte babesa eta inklusioa sendotuko dira.
“Lanbide enplegu politika aktiboen elementu nagusi bihurtu da, eta arreta berezia eskaintzen die gazteei, emakumeei, adinekoei eta zaurgarritasun egoeran dauden kolektiboei. Inklusiorako Euskal Sistemaren egituraketan aurrera egin nahi dugu, eta eskatzaile guztiei enplegurako eta inklusiorako plan pertsonalizatuak egiteko eskubide subjektiboa bermatu nahi zaie”, azpimarratu du Torresek.
2026ko aurrekontuak igoera handia aurreikusten du enpleguko eta tokiko garapeneko planak egiteko udalei emango zaizkien diru-laguntzen partidan. 2025ean 1,2 milioi eurokoa izatetik 2026an 5,4 milioi eurokoa izatera igaroko da, 10.000 biztanletik gorako udalerrietara hedatuz. Neurri horri esker, enpleguaren tokiko dimentsioa indartuko da, eta eragile eta erakundeek Enpleguari buruzko 15/2023 Legearen garapenean parte hartzea sustatuko da.
“Udalak protagonista izatea nahi dugu lan aukerak sortzen eta udalerrien garapen ekonomikoan. Tokiko erakundeekin lankidetzan aritzea funtsezkoa da enplegu politikak lurralde bakoitzaren errealitate eta beharretara egokitzeko”, azaldu du sailburuak.
Sailak, halaber, indartu egingo du lan merkatuan gizonen eta emakumeen arteko berdintasun eraginkorrarekin duen konpromisoa, eta partida espezifikoak bideratuko ditu emakumeen ekintzailetza sustatzeko, soldata arrakalaren aurkako borrokarako, genero ikuspegia lan arriskuen prebentzioan txertatzeko eta berdintasunari buruzko formakuntzak antolatzeko gizarte eragileentzat eta berdintasun batzordeentzat.
Era berean, enpleguaren kalitate indize bat eta Euskadiko aldi baterako ezintasunari buruzko azterlan bat egitea aurreikusten da, lan baldintzak hobetze eta enplegu seguruagoa eta osasungarriagoa lortze aldera.
“Enpleguaren kalitatea eta aukera berdintasuna dira gure ekintzaren funtsezko zutabeak. Pertsonen kudeaketan berrikuntza, ekonomia sozialari laguntzea eta zainketen sektoreko artikulazio ekonomiko eta profesionalaren aldeko apustua egiten dugu”, adierazi du Mikel Torresek.
Aurrekontu horren barruan dira, era berean, Gizarte Ekonomiako Sailarteko II. Planerako baliabideak, ASETT – Arizmendiarrieta Social Economy Think Tank gisako berrikuntza proiektuak, digitalizazioaren bidez kudeaketa publikoa modernizatzea, politikak ebaluatzea eta eragile sozial eta ekonomikoekiko lankidetza ere.
“Aurrekontu horiek euskal ekonomia eraldatzeko, gizarte eta enpresa ehuna indartzeko eta Euskadirentzat etorkizun bidezkoagoa, inklusiboagoa eta iraunkorragoa bermatzeko tresna dira”, esanez amaitu du lehendakariorde eta Ekonomia, Lan eta Enplegu sailburu denak.
